يوم الفراق

 يا اللّي تقولِّي كيف كان الفراق؟!

الفراق راه كان صعيب

كيف السم ما لقيت لو ترياق

لا فطب حديث لا تعشيب

جرح قلبي زادُو لو لعماق

ما برى ما نفع معاه طبيب

والطابلو طحالُو تعلاق

تلّي رقمك وسبّق رقم لحبيب

فرحتْ لنجاحها ونسيتْ الفراق

والبسمة فوجهي ما بغاتْ تغيب

ونجاحي بسال ما بقالو مذاق

خسارتي لفاتحة منها القلب يطيبْ

خفت نبكي يقولوا هذا لحماق

حتى نجح عاد جاه النحيب

نعذرهم فالخسارة اختلفت لذواق

كاين اللي "الباك" كان دايرو لحبيب

يا اللي خسرت معايا دير اتفاق

خذ "باكي" وجيب لي غير فاتحة نصيب

يا اللي تقولّي كيف كان الفراق؟!

الفراق راه الرضيع فيه يشيب

كان بالعين ماشي بالتعناق

والمحبوب حلف ما يكون قريب

والشمس حارة تسيل لعراق

والقلب للدموع دَرْ سْكيبْ

تسالى الكلام وتسالاوْ لوراق

نهار الفراق ما يفيد رغيب

لساني بكم وما بغى تعياق

وكبريائي دايرة رقيب

اللّي يحلم لازمو لفياق

وكلمة "لا" فقلبي شاعلة لهيب

بمبروك النجاح ما نطقْ نطّاقْ

حتى العديان كان قلبهم رْطيبْ

قالوا اليوم لا بد من الفراق

آجيوا نتوادعوا ونساوْا العيب

أما أنا الوداع كان عليا شاق

ما توصفوش حتى كلمة رهيب

تفارقنا وتلفتتْ الأعناق

والرجل ثقالتْ ما بغاتْ زريب

بْحَالّي للقبر ساقني سوّاق

وفاتحة الروح منّي هربتْ هرِيبْ

مشات والسّاق يتبع السّاق

حتى درﮔت وما نفع ترﮔيب

بحالّي زيرتْ يدي على زوَاق

وملي فتحتها تقول واش نصيب

تفلت من بين صباعي ودَرْ شقاق

بحال السن اللّي تـﮕـلع بكلاليب

يا اللّي تقولّي كيف كان الفراق؟!

فراقي لا ديرو فراق حبيب

الراعي اللّي والفتو عام كِي لعناق

سمح فيا وخلاني للذيب

قلت لو نحبك بزاف وما ثاق

حسبني عاشق غير اللعيب

هرب مني وما قدرتْ ليه لحاق

مشى وتركني فوقت عصيب

الصيف يحرق وزادتني لشواق

غير نتفكر فاتحة القلب يطيب

والدموع تسيل كِي لمراق

والعديان كلاوني فالغِيبْ

الدم اللّي كان عندي في فمهم تراقْ

تهافتوا عليه وشربوه كِي لحليب

غير يشبع من جيفتي شي ذوّاق

يقول الحمد لله هجرُو لحبيب

مشات فاتحة وضاقت الآفاق

وشمس حبها ما بغاتْ تغيبْ

جلست فالدار والباب طحَالُو تطراق

غير شافتْ حالتي بغاتْ ترِيبْ

سولتْ على فاتحة فكل زقاقْ

وسؤالي ما لقيت لو مُجيبْ

قلت فالجامعة نكون ليها سبّاق

قلبتْ عليها وما نفعني تنقيب

فاللائحة غيرْ اسمها برّاق

مسجل، عليه ما طحَى تشطيب

مكتوب بالفرنسية بخطوط رقاق

لفاتحة .... قلبي دَرْلُو تعريبْ

جلست فالدار تغسل لطباق

حتى يجيها شِي خطيب

للامتحان تقرى غِي لوراق

وتجي تدوزو ملّي يكون قريب

وقلبي عليها ما صبر ما طاق

في تازة عايش وحدي كِي لغريب

جامعة وما جمعتش بين العشاق

من هاد السمية راني فالرِّيبْ

ما صبروني لا إخوان لا رفاق

بكلمة الحب ﮔاع ما نطق خطيب

ما كاينْ غير النزاع والشِّـقاق

والساحة عمرتْ غير بالترهيب

تمنيتْ ندير حلقية ونبرّح فأبواق

بغيت فاتحة ما بغيتْ تحزيبْ

راه قلبي ليها تـوّاق

ووجهي تّقرى فيه كلمة كئيبْ

والدموع كواتني بحراقْ

على خدي دايرة صَبيبْ

المدرج عامر غير زْوَاقْ

والسميّات من كل حرف تصيب

حتى فاتحة منها جُوجْ شقاقْ

فمسلك الجغرافيا اللي بغى تكذيب

ذكروني بيها ما نساوني لشواق

من غير الجرسيفية ما بغيت حبيب

راها فقلبي لصقتْ لصاق

ديما حاضرة ما بغاتْ تغيبْ

وصحابي يقولولي طلقها تطلاق

ولا كونْ ليها من حبابها خطيب

قلت ليهم هذا راه بعينو لحماق

الطالب خدم بقالو غير نسيب

فاتحة نعطيها روحي فصداق

بلا ما تقولها ما نحوجها لطلِيبْ

عندي عزيزة ما نديهاش بالتلباقْ

يلا كانت فمكتابي دابا الله يجيب

راه المغرب العيش فيه ما يضياق

ديما فعيني يبان رْحِيبْ

فالخارج حلفتْ ما ندير اوراق

قارب الموتْ ما بغيتْ فيه رْكِيبْ

واخا زمانّا عمرْ غير بالنفاق

اللّي يحب بصِدقْ محال واش يخيب

راه الله هو اللّي كتب لرزاق

ماشي الخياط اللّي يفصل الجِّيبْ

شحال من جيبْ بالرزق ضياق

وهو صغرو ما كان ليه حسِيبْ

يا اللّي تقولّي كيف كان الفراق؟!

الفراق راه الرضيع فيه يشيب

تزوجَتْ فاتحة ليها ما بغيتْ طلاقْ

يا الله صبّرني على المَكاتِيبْ